হিৰণ্য ডেকা

হিৰণ্য ডেকা অসমৰ এগৰাকী অভিনয় শিল্পী। ১৯৮১ চনত অপৰূপা নামৰ ছবিখনৰ জৰিয়তে তেওঁ অসমীয়া চলচ্চিত্ৰৰ জগতত খোজ পেলায়। তেওঁ আৰু অভিনেতা তপন দাস একেলগে সোণাৰাম হাইস্কুলত পঢ়িছিল। তেওঁ অভিনয় কৰা অন্যান্য কথাছবি হৈছে ইমান মৰম কিয় লাগে, কন্যাদান, বিধাতা, মিঠা মিঠা লগনত, কাদম্বৰী, ৰত্নাকৰ আদি।

উদ্ধৃতিসমূহ

1. মই সেই দুটা বস্তু, গাওঁ আৰু চহৰৰ অনুভৱটো সৰুৰপৰাই পাই আহিছিলোঁ৷ গাঁওৰ প্ৰতিশ্ৰুতিবিলাক গাঁওতেই থাকে, মানে গাঁও মানেনো কি বুজি পাইছিলোঁ৷ চহৰৰো বহু কথা দেখি শুনিয়েই শিকিছিলো, য’ত সৰুৰপৰাই ডাঙৰ হৈছিলোঁ৷
2. আমাক কোনেও হাতত ধৰি শিকোৱা নাছিল৷ আমি সকলোৱে নিজে নিজে আগবাঢ়িছিলোঁ৷ তপন দাস আৰু মই সেই সময়ত তেনেকৈয়ে আগবাঢ়িছিলোঁ।
3. ৰসৰ অভিনয়ৰ বিষয়ে সৰুতে মই একো নাজানিয়েই এনে চৰিত্ৰত অভিনয় কৰিছিলোঁ৷ পিছলৈ যেতিয়া বুজি পোৱা হলো তেতিয়া দেখিলো যে মোৰ শাৰীৰিক অবয়ব বা মোৰ শাৰীৰিক গঠনেৰে মই নায়ক বা ভিলেইন হবলৈ গ’লে নিমিলিব৷ এনেদৰে কিছু চৰিত্ৰ ৰূপায়ণ কৰি গ’ম পালোঁ যে এইধৰণৰ চৰিত্ৰহে কিজানি মোৰ সৈতে মিলিছে৷ যিধৰণৰ চৰিত্ৰৰ বাবে মানুহে মোক সহাঁৰি দিয়ে, সেই বিষয়টো লৈ মই অলপ চিন্তা চৰ্চা আৰম্ভ কৰি দিলোঁ৷ তাৰ পিছলৈ আৰু বেলেগ চিন্তা কৰা নাই৷ তেনেকৈয়ে ৰসৰ উদ্বেগ হব পৰা চৰিত্ৰত অভিনয় কৰাৰ চিন্তা চৰ্চা মনলৈ আহিল৷
4. অসমখনত আমাৰ নামনি, উজনি…উজনিৰো বহুত ভাগ আছে, ঠাই বিশেষে বেলেগ বেলেগ কথনশৈলী, শব্দক্ষেপন আৰু নামনি অসমতো দহ-পোন্ধৰ কিলোমিটাৰৰ মূৰে মূৰে ভাষাৰ ব্যৱধান, শব্দৰ প্ৰয়োগ মানে কথনশৈলী সেইবোৰৰ প্ৰতি সৰুৰে পৰা কব নোৱাৰাকৈ অলপ আকৃষ্ট হৈছিলোঁ।
5. সৰু কথা, হাঁহি উঠা কথা কিছুমানতে সমাজৰ বাবে বহু বাৰ্তা সোমাই থাকে৷ পিছে সেই বাৰ্তাখিনি সঠিকভাৱে আমি মনলৈ আনিব পৰা নাই আৰু বহুত বাকী আছে৷ আমাৰ সমাজক লৈ, আমাৰ সমাজৰ কাম-কাজ, কৰ্ম, আমাৰ সংস্কৃতিক লৈ, আমাৰ বিভিন্ন সংস্কৃতিক লৈয়ো বহু ব্যংগ আছে৷ আমাৰ খাদ্য সংস্কৃতিক লৈও হ'ব পাৰে, পিন্ধন উৰণক লৈও হব পাৰে, ভাষাক লৈও ব্যংগৰ সৃষ্টি হ’ব পাৰে৷
6. ভ্ৰাম্যমাণৰ দৰকাৰ আছে৷ পৃথিৱীৰ ক’তোৱে নথকা সাংস্কৃতিক আন্দোলন এটা৷ ভ্ৰাম্যমাণ থিয়েটাৰ চলি থকাতোৱেই আমি বিচাৰোঁ৷
7. চাপক নিয়ন্ত্ৰণ কৰিব পৰা বস্তুটো হৈছে হাস্যৰস৷ আৰু হাস্যৰস যদিহে উপভোগ্য হয়, সেই হাস্যৰসে যদি হাঁহিৰ উদ্ৰেক ঘটাব পাৰে; মানে যি ৰস দিছে সেই ৰসৰ কথাখিনিৰ কৰ্মকাণ্ডত যদি কোনোবা অচিনাকি ব্যক্তিয়েও ৰস পাইছে সেইটোতকৈ ডাঙৰ কথা নাই৷
8. ভালপোৱা ব্যক্তি বহুকেইজন আছে৷ মুনিন বৰুৱা, মই তেখেতৰ বহুকেইখন ছবিত অভিনয় কৰিছো, তেখেত মোৰ প্ৰিয় মানুহ৷ সঞ্জীৱ হাজৰিকা মোৰ প্ৰিয় মানুহ৷