অৰুণ হাজৰিকা

অৰুণ হাজৰিকা হৈছে অসমৰ এজন চলচ্চিত্ৰ সহ পৰিচালক, প্ৰশিক্ষক তথা অভিনেতা। তেওঁ বেছিভাগ চলচ্চিত্ৰতে ব্যংগ অভিনয়ক সম্পূৰ্ণ অকৃত্ৰিম আৰু বাস্তৱিক ৰূপত প্ৰতিফলিত কৰি শ্ৰোতা-দৰ্শকৰ মন জয় কৰিছে। জোনবাই ভিচিডিৰ নেত্ৰকাই চৰিত্ৰটিৰে তেওঁৰ এক সুকীয়া পৰিচয় আছে বুলি অসমীয়া চলচ্চিত্ৰপ্ৰেমীয়ে কয়।

উদ্ধৃতিসমূহ

1. অভিনয় কৰিলোঁ জীৱনৰ প্ৰথমখন নাটক “তেজে ৰোৱা ধান”,যিখন নাটকে সেইবাৰ শ্ৰেষ্ঠ দলৰ পুৰস্কাৰ পাবলৈ সমৰ্থ হ’ল৷ সেইবাৰ তৌফিক দাহঁতেও অভিনয় কৰিছিল৷ পিছদিনা আমাৰ প্ৰধান শিক্ষক মহোদয়ে আমাৰ বিদ্যালয় চুটিৰ পাছত আমাৰ অভিনয় গোটৰ সকলোকে মাতি আনি প্ৰশংসা কৰাৰ লগতে ষ্টুডিঅ’ত নি ফটো উঠাৰো ব্যৱস্থা কৰিলে৷ পাছত আমাৰ এই কৃতকাৰ্যতাৰ কথা বাতৰি হিচাপে জনমভূমি কাকততো প্ৰকাশ হৈছিল,যি আমাৰ বাবে অফুৰন্ত উৎসাহ আৰু প্ৰেৰণাৰ সম্ভাৰ আছিল৷
2. চিনেমাৰ লগত সংযোগ প্ৰথম আৰম্ভ হৈছিল,১৯৯০ চনত৷ প্ৰয়াত শ্ৰদ্ধাৰ অতুল বৰদলৈ দেৱৰ চিনেমা চিঞৰৰ মাধ্যমৰে৷ প্ৰযোজনাত আমাৰ বোকাখাতৰে দুই চাৰিয়ে আগভাগ লৈছিল৷ অতুল দায়ে ক’লে চিনেমা কৰিবলৈ মন আছে নেকি! মোৰ সঁহাৰি পাই ক’লে তুমি সহকাৰী পৰিচালক হ’ব লাগিব,তেনেকৈয়ে চিনেমাৰ জগতত ভৰি দিলোঁ৷ কোনটো দৃশ্যত আগদিনাৰ দৃশ্যগ্ৰহণ শেষ হৈছিল বা নায়কে কোনটো চোলা পিন্ধি আছিল,কেইটা বুটাম চাৰ্টৰ খোলা আছিল- এনেকুৱা প্ৰতিটো খুটি নাটিয়ে টুকি গৈছিলো৷ সহ পৰিচালকৰ অভিজ্ঞতায়ে বহুখিনি পুৰঠ কৰি তুলিলে৷ অতুল দায়ে বহুত কথা শিকাইছিল৷
3. দৰ্শকে মনোৰঞ্জন বিচাৰে৷ মই অভিনয় কৰা জোনবাই নামৰ ভিচিডি ছবিখনৰ নেত্ৰকাই চৰিত্ৰটোৰ বাবে মোক অসমৰ গাঁৱে ভু়ঞে অৰুণ হাজৰিকা নামতকৈ নেত্ৰকাই নামটোৰেহে ভালকৈ চিনি পায়৷
4. প্ৰকৃততে দৰ্শকে ছবি এখনত মনোৰঞ্জনৰ মাধ্যমেৰে নিজৰ চিনাকি চৰিত্ৰ,কাহিনী বা পৰিৱেশৰ প্ৰতিফলন চাই ভাল পায় আৰু এই ক্ষেত্ৰত ব্যংগ ছবিৰ উপস্থাপনে সবল ভূমিকা গ্ৰহণ কৰে৷
5. প্ৰয়াত মুনিন বৰুৱাৰ ছবিত অভিনয় কৰা প্ৰায়বোৰ চৰিত্ৰয়ে মোৰ প্ৰিয়৷ তেখেতৰ ছবিত চৰিত্ৰবোৰৰ খুব গুৰুত্বপূৰ্ণ ভূমিকা থাকে। যাক আমি “কেৰেক্টাৰ এচটাব্লিচমেণ্ট” বুলি কও,সেয়া খুব ভাল৷
6. মোৰ মতে মানুহ বয়স বঢ়াৰ লগে লগে আৰু অধিক সজীৱ,উদ্যমী আৰু প্ৰাণৱন্ত হোৱা উচিত৷ অসুখ বা জীৱনৰ বাধা বিঘিনী নেওচি আগবাঢ়ি যাব লাগে৷
7. সমাজক বাদ দি শিল্পীজনৰ কোনো অস্তিত্ব নাই,সমাজৰ মাজতেই শিল্পীজন জীয়াই থাকিব লাগিব৷ কিন্তু শিল্পীৰ মোহৰটো লগাই শিল্পীৰ নাম লৈ ৰাজনীতিলৈ যাব নালাগে৷