হাৰমাইনি গ্ৰেইঞ্জাৰ

হাৰমাইনি জিন গ্ৰেইঞ্জাৰ (ইংৰাজী: Hermione Jean Granger) ব্ৰিটিছ লেখিকা জে. কে. ৰাউলিং ৰচিত হেৰী পটাৰ কল্প কাহিনী শৃংখলাৰ এক কাল্পনিক চৰিত্ৰ। শৃংখলাৰ প্ৰথম উপন্যাস হেৰী পটাৰ এণ্ড দ্য ফিলোছফাৰ্চ ষ্টোনৰ পৰা পৰৱৰ্তী প্ৰতিখন উপন্যাসতে তেওঁৰ উপস্থিতি আছে। শৃংখলাটিত হেৰী পটাৰ আৰু ৰন ৱিজলিয়ে তেওঁক ছোৱালীৰ স্নানাগাৰত এটা বৃহৎ ট্ৰ'লৰ পৰা ৰক্ষা কৰে আৰু তেতিয়াৰে পৰা তেওঁলোক অত্যন্ত ঘনিষ্ঠ বন্ধু হৈ পৰে। তেওঁ প্ৰায়ে নিজৰ প্ৰত্যুৎপন্নমতিতা,প্ৰখৰ স্মৃতিশক্তি আৰু অভিধান প্ৰমাণ জ্ঞান ব্যৱহাৰ কৰি ভাল পায়। ৰাউলিঙে কৈছে যে তেওঁ হাৰমাইনিৰ মাজেৰে তেওঁৰ নিজৰ সৰুকালৰ চৰিত্ৰক প্ৰকাশ কৰিছে।