খনীন চন্দ্ৰ চৌধুৰী

খনীন চন্দ্ৰ চৌধুৰী হৈছে এজন অসমীয়া গণিত-সাধক, পাঠ্যপুথি প্ৰণয়ক। তেওঁ অসমৰ গুৱাহাটী বিশ্ববিদ্যালয়ৰ গণিত বিভাগৰ এমেৰিতাছ প্ৰফেছৰ হিচাপে সন্মান পাইছিল। তেওঁ বিমুৰ্ত গণিতত বিশেষকৈ বীজগণিতত বহুলভাৱে কৰা গৱেষণাৰ বাবে পৰিচিত। তেওঁক গল্ডি মডিউলৰ গঠন আৰু গল্ডি নিয়েৰ-ৰিং বুলি কোৱা ধাৰণাটো সম্প্ৰসাৰণ কৰাৰ মান্যতা দিয়া হৈছে।

উদ্ধৃতিসমূহ

1. গণিতৰ প্ৰতি আকৰ্ষিত হোৱা বিষয়টো মোৰ ক্ষেত্ৰত নাখাটে! প্ৰথম, দ্বিতীয়, তৃতীয় শ্ৰেণী পৰ্যন্ত পঢ়া-শুনা কিয় কৰিব লাগে একো বুজা নাছিলোঁ। সপ্তম শ্ৰেণীত আহি পৰিছিল জ্যামিতি আৰু ইয়েই আমাৰ জীৱনৰ এটা মোৰ বা 'টাৰ্ণ' বুলি ক'ব পাৰি।
2. অষ্টম শ্ৰেণী আহি পাইছিলোঁ। কিয় জানো জ্যামিতিৰ সংজ্ঞা আৰু সূত্ৰই আমাৰ মনোজগতত এক কাৰিকৰী-সৌন্দৰ্য আৰু নান্দনিকতাৰ ৰেশ বিয়পাই দিছিল। উপপাদ্যৰ প্ৰমাণৰ মাজত সোমাই ৰোৱা যুক্তিৰ শৃংখলাখিনিয়ে আৰু সাধাৰণ জনজীৱনৰ বোধাত্মক ভাৱ-চিন্তাসমূহে মিলি এক খেলিমেলি আনি নিদিয়াও নহয় পিছে।
3. আজিও মনত পৰে কেনেকৈ স্কুল ছুটী হোৱাৰ পাছত আমি দুজন বন্ধুৱে আলিবাটৰ কাষতে পোৱা ‘চিনপৰা ভিঠি’ৰ সমুখত আলিবাটতে বহি লৈ থকা চকমাটিৰে জ্যামিতিৰ চিত্ৰ আঁকি চিন্তা কৰিছিলোঁ – একোটা জ্যামিতিৰ অনুশীলনী।
4. জ্ঞানান্বেষণ কোনো চৌখিনতা নহয় যে – ই প্ৰাণৰ কথা! জ্ঞানান্বেষণ আমাৰ এক তেজত প্ৰবাহিত হৈ থকা স্বভাৱ।
5. নিজৰ বাবে লাগতিয়ালখিনিকে ভালকৈ শিকাতো কিমান যে প্ৰয়োজনীয়!
6. নিজকে ফাঁকি দিয়েই আমি আমাৰ সমাজ, পৰিৱেশ আৰু ঘৰখন বিপথে পৰিচালিত কৰোঁ।
7. পৰীক্ষাৰ বাবে প্ৰস্তুতি চলাই সেইখিনিত নম্বৰ লোৱা আৰু ‘সৃষ্টিশীলতা’ এই দুই পূৰা ভিন্ন বিষয়!
8. গাণিতিক সূক্ষ্ম-বিশ্লেষণ কোনো কিতাপ পঢ়ি অনা কথা নহয়! ই ব্যক্তি বিশেষৰ এক চাৰিত্ৰিক-বৈশিষ্ট্যহে!