অমূল্য বৰুৱা

অমূল্য বৰুৱা আছিল এগৰাকী অসমীয়া কবি তথা সাহিত্যিক। বিৱৰ্তনৰ পথেৰে তেওঁ অসমীয়া কবিতাৰ প্ৰগতিশীল ধাৰাটো বোৱাই লৈ যাব বিচাৰিছিল। সেয়েহে তেওঁক 'কালান্তৰৰ কবি' বুলি কোৱা হয়। এইজনা কবিয়ে ছাত্ৰাৱস্থাতে অসমীয়া কাব্য জগতলৈ এক বৈশিষ্ট্যপূৰ্ণ অৱদান আগবঢ়াই থৈ গৈছে। গতানুগতিকতাক আঁতৰাই থৈ নতুন বিষয়-বস্তুৰ অৱতাৰণাৰে লিখা অমূল্য বৰুৱাই, কাব্য জগতত এক আলোড়নৰ সৃষ্টি কৰিছিল।

অমূল্য বৰুৱা

উদ্ধৃতিসমূহ

• আমাৰ আছে মানুহৰ ওপৰত বিশ্বাস; আমাৰ আছে ভবিষ্যতৰ সুস্থ ৰঙা সূৰ্য্যৰ পিনে চকু।
• হে বীৰ নকৰিবা দুখ, নালাগে শুনিব আজি ক্লেদময় জীৱনৰ সেই দাসত্বৰ কলা ইতিহাস। আজি মোৰ মুক্ত হ'ল ৰুদ্ধ পিঞ্জৰাৰ লোহাৰ দুৱাৰ।
• ক্ষুধাৰ তাড়নাত সিহঁতে পাহৰি যায় "অহিংসা পৰম ধৰম"। সিহঁতৰ অশৃংখল কোলাহলপূৰ্ণ, হিংসামত্ত সমাজত ক্ষুধা নিবাৰণৰ কেৱল কঠোৰ সংগ্ৰাম! যুধিষ্ঠিৰৰ লগত স্বৰ্গাৰোহণৰ আশাত ধৰ্মযাত্ৰা কৰিবৰ মৰসাহ আৰু সিহঁতৰ নাই।
• তুমিয়ে ধনীক সম্প্ৰদায়ৰ বিৰুদ্ধে বনুৱাৰ শ্ৰেণী সংগ্ৰামৰ এটা সংকট পূৰ্ণ ‘ষ্ট্ৰেটেজিক পইণ্ট', তুমি কুৰি শতিকাৰ লগ্ন সভ্যতাৰ নিৰ্ভীক বীৰাঙ্গনা।
• মুক্তি কামী শক্তি কামী জাগা জাগা বিজয় ডঙ্কা বিজয় গান মুক্তি কামী শক্তিমান আগুৱান আগুৱান।

তেঁওৰ বিষয়ে উদ্ধৃতি

• তেওঁ নিজক কবিতাত যিখিনি প্ৰকাশ কৰিছিল, তাতকৈ বহুত বেছি পৰিমাণে তেওঁৰ জীৱনৰ সকলো ক্ষেত্ৰতে প্ৰাণৰ প্ৰাচুৰ্যৰে নিজক ব্যপ্ত কৰিছিল৷ অন্তৰৰ ভিতৰত জাগি ্থকা এটা তীব্ৰ উন্মাদনাই তেওঁক সকলো সময়তে অস্থিৰ কৰি তুলিছিল৷ গল্পই, গানে, কাব্য-চৰ্চাই, সৌন্দৰ্যপিয়াসী কল্পনাৰ বাধাহীন লাবণ্যবিলাসে তেওঁৰ পৰিৱেশক সকলো সময়তে উজলাই ৰাখিছিল৷ সেই অফুৰন্ত প্ৰাণময়তাই জীৱনৰ অভিজ্ঞতাৰ দ্বাৰা সমৃদ্ধ হবৰ সুবিধা পোৱা হ’লে, সেই সৌন্দৰ্য তৃষ্ণাই বাস্তৱৰ ব্যাপক উপলব্ধিৰ ভিতৰেদি প্ৰতিবিম্বিত হৈ সাত বৰণৰ ৰামধেনু হৈ জিলিকি উঠিবৰ সুবিধা পোৱা হ’লে অসমীয়া সাহিত্যাকাশৰ দিগন্ত নতুন ৰহণেৰে বহু বেছি সমুজ্জল হৈ উঠিলহেঁতেন।
  • ভবানন্দ দত্ত