অতনু ভট্টাচাৰ্য

অতনু ভট্টাচাৰ্য (জন্ম: ১৯৬৭) অসমৰ এগৰাকী কবি, গল্পকাৰ, সম্পাদক আৰু গল্পকথক। বৰ্তমানলৈকে তেখেতৰ ৪খন কবিতাৰ পুথি, ৪খন গল্পপুথিৰ উপৰিও অন্যান্য সৃষ্টিশীলমূলক প্ৰবন্ধ সংকলন, সাক্ষাৎকাৰমূলক গ্ৰন্থ প্ৰকাশ হৈছে।

উদ্ধৃতি

বৰষুণৰ চেতাৰ

• অকলে অকলে খোজ কাঢ়িলে বতাহৰ সৈতে কথা পাতিব পৰা যায়, গুণগুণাই মন ভাল লগা গানৰ দুশাৰী ওঁঠলৈ আনিব পৰা যায়, নিজক আৰু অলপ বুজিব পৰা যায়।

সৃজনীমূলক সাহিত্য প্ৰেৰণা আৰু আৰ্হি

• হৃদয়ৰ নিভৃত কোণৰ পৰা কোনো তাড়না অনুভৱ নকৰাকৈয়ে যদি আপুনি কবিতা লিখিবলৈ লৈছে তেন্তে মই ক'ম- যিমান সোনকালে আপুনি কবিতা লিখিবলৈ এৰিব সিমানেই কবিতা, আপুনি আৰু পঢ়ুৱৈ সমাজ- এই তিনিওৰে প্ৰতি সুবিচাৰ কৰা হ'ব।
• একধৰণৰ গভীৰ শ্ৰদ্ধা আৰু ভালপোৱা নাথাকিলে কোনো শিল্পকৰ্মৰ সৈতে কাৰো সম্পৰ্ক স্থায়ী অথবা দীঘলীয়া নহয়। আনক ক'বলৈ নহয়- নিজক ক'বলৈকে এটা সুন্দৰ আৰু শুভ উদ্দেশ্য নাথাকিলে কোনো মাধ্যম ফলপ্ৰসূ নহয়।
• পৰিৱেশ্য কলাৰ কিছুমান মাধ্যমে মঞ্চৰ সন্মুখৰ এচাম দৰ্শকক আনন্দ দিয়ে, ক্ষন্তেকৰ বাবে অভিভূত আৰু আহ্লাদিত কৰে। মই বিশ্বাস কৰোঁ, সাহিত্য পঢ়ুৱৈক ওপৰে ওপৰে তৃপ্ত কৰা মাধ্যম নহয়। ই মানুহৰ অভ্যন্তৰত প্ৰৱেশ কৰে। ই স্পৰ্শ কৰে মানুহৰ মৰ্মমূল।
• গ্ৰাহক হিচাপে পঢ়ুৱৈৰ একধৰণৰ পছন্দ আছে, লেখক হিচাপে আমি কিছুমান পছন্দক সঁহাৰি নজনাবও পাৰোঁ। কিন্তু মানুহ হিচাপে পঢ়ুৱৈৰ কিছু প্ৰয়োজন আছে, লেখক হিচাপে আমি সেই প্ৰয়োজনক আওকাণ কৰিব নোৱাৰোঁ।
• সকলো সম্পৰ্কৰ মাজত থকা এটা সৰল সত্য হ'ল এই যে আপুনি মোক ভাল পাবলৈ হ'লে মই আপোনাৰ প্ৰতি আগ্ৰহ প্ৰকাশ কৰিব লাগিব।